Fitzgerald Kusz
Zwedschgä
Mit einem Nachwort
von Helmut Haberkamm
ars vivendi
Vollständige eBook-Ausgabe der im ars vivendi verlag erschienenen Originalausgabe (1. Auflage 2012)
© 2012 by ars vivendi verlag
GmbH & Co. KG, Cadolzburg
Alle Rechte vorbehalten
www.arsvivendi.com
Umschlaggestaltung: Svetlana Handschuh
Datenkonvertierung eBook: ars vivendi verlag
eISBN 978-3-86913-337-9
Inhalt
I. diägaddn
II. midm falschn fouß
III. budzlkäih
IV. marmälood
V. kubfwäih
VI. nebel, väzäich di – neue haikus
Nachwort
Laudatio auf Fitzgerald Kusz
Der Autor
I. diägaddn
der fränkische anrufbeantworter
grüß godd
iich bins
iich bin fei ned dou
woui bin
moochi ned soong
wenns saa mou
könnäs mä dou
nachm bfeifdoon
wos draff soong
sie könnäs
obbä aa
genausugoud
saa loun
ade
wassd scho
weä waaß scho
wäi schbeeds is
kannä waaß dassis waaß
weä waaß scho
wos di uä gschloong houd
kannä waaß obbis waaß
weä waaß scho
wos aff ann zoukummd
kannä waaß wossi waaß
weä waaß scho
wos aff ann wadd
kannä waaß wos
kannä
wos waaß denn iich
der erotische garten
di hordensien schdennä aff di rosn
di rosn flördn middi lilien
di lilien baggern inn oleander oo
dä oleander is näsch aff di dohlien
di dohlien senn scharf aff di wickn
di wickn bussiän middi gänseblümmlä
di gänseblümmlä schwärmä fiä di dulbm
di dulbm schmachdn di fuchsschwänz oo:
obbä däi hamm blouß nu aung
fiä di sunnäblummä
des
des gibds ned
des glabbsd ned
des derf ned woä saa
des gäihd ned in mein kubf nei
des läßd mä kann rouh
des houi kummä säing
des hammä edz dävoo
des kummd aff uns zou
des kammä ned aufhaldn
des kummd unvähoffd
des bläihd uns
des is aff amall dou
zwedschgä
sehr frei nach w. c. williams
wou senn däi zwedschgä
däi zwedschgä woui
in kiehlschrank nei hou
iich möchäd wissn wou däi
zwedschgä hiikummä senn
däi goudn goudn zwedschgä
däi woän su säiß su zuggäsäiß
iich hou mi scho su draff gfreid
däi senn kamm wos oogangä
däi houi fiä miich affd seidn
iich will mei zwedschgä widdä
wou senn däi
weä houd däi
weä
vegetarisches massaker
di domoodn könnä nu su schreiä
däi kummä undäs messä
di gelbäroum solln es maul haldn
däi werrn ganz fein zäschdückld
dä salood soll aufhörn zum jammern
deä werd underm wassähohnä dädränkd
di gurkn solln si blouß ned su aufreeng
däi werrn schäi in scheim gschniidn
di radieslä kummä aa ned dävoo
dennä werd dä kubf oogrissn
di zwiebl greinä umäsunsd
däi werrn klidzäklaa zähackd
allers mou schderm
obbä iich leeb
umsunsd
worschd aff wos dassd waddsd
obsd haid waddsd
oddä morng waddsd
obsd dähamm waddsd
oddä foddgäihsd und waddsd
obsd richdi waddsd
werkli richdi waddsd
oddä obsd blouß su dousd
als obsd ned waddsd
obwuhlsd doch waddsd
worschd aff wos dassd waddsd
du waddsd umsunsd weil:
des aff des wos waddsd
des wadd aff diich
goudä freind
goudä freind und kubfäschdechä
worschdbabiä & scheißhausleckä
kniedläskubf & bfennifuchsä
gschafdlhubä & geldooluchsä
belferä & maulaufreißä
brodzlsubbm & husnscheißä
schbrichbeidl & werdshaushockä
rumzuuch & maadläsgoggerä
diddläsbadschä & schweinebroodn
nachdgiichä & oärschgranoodn
dreeckbär & schlaggälä
maulaff & gäggälä
bulfärä & barfedzlaafä
bubblfressä & dreeckväkaafä
beddbrunzä & schmiädiegl
doochdäib & lausniegl
ruudzleffl & schlaaferä
schleimscheißä & gaaferä
so edz langds mä aa
mach di aff di baa
diägaddn
iich hou enn fruusch im hals
schmeddäling im bauch
hummeln im hindern
enn flouh im ohr
& enn vugl:
wenn deä ned weä
weä allers
halb su schlimm
terminkalender
am sunndooch binni
viel zu fräih aufgwachd
am monndooch houi
mi beinooh välaufm
am diensdooch binni
in reeng kummä
am midwoch binni
dähamm bliem
am dunnersdooch is
nix in dä zeidung gschdandn
am freidooch houi mä
di hoä schneidn loun
am samsdooch woä
di wochn rum
lufdschloss
nix schenners wäiä lufdschloss
des kosd di nix
des koosd iberoll hiibauä
dou brachsd ka baugenehmichung
dou brachsd ka geld aufnehmä
dou brachsdi ned mid dä
bauschboäkassä rumärchern
dou brachsd kann kaufvädrooch
dou moußd kann gredidd ooschdoddern
dou hasd kanne nachbann